افراد مسلح در لوگر یک معلم را در داخل مکتب کشتند

سپوتنیک،‌ کابل: وزارت معارف افغانستان اعلام کرده که چند فرد مسلح در ولایت لوگر، یک معلم مکتب دخترانه را از صنف کشیده و در داخل باغچه این مکتب با ضرب گلوله به قتل رسانده‌اند.

این وزارت در اعلامیه‌ای که امروز منتشر کرده،‌ می‌گوید که این حادثه روز سه‌شنبه در مکتب نسوان کمال خیل، مرکز ولایت لوگر صورت گرفته است. وزارت معارف از معلمی که به قتل رسیده بنام «عبدالفتاح» یاد کرده و می‌افزاید که وی به شکل بی‌رحمانه به قتل رسیده است.

وزارت معارف جزییات بیشتری در مورد انگیزه این قتل ارایه نکرده،‌ اما نیروهای امنیتی خواسته تا در شناسایی عاملان این رویداد تلاش کنند.