به گزارش اسپوتنیک، دفتر رسانه ای شورای عالی مصالحه ملی افغانستان نوشت: دکتور عبدالله عبدالله رییس شورای عالی مصالحه‌ی ملی امروز (سه شنبه 25 سنبله) در دفتر کارش با محترم شراف‌الدین امام، سفیر جمهوری اسلامی تاجیکستان ملاقات تودیعی کرد.
در ادامه این خبرنامه آمده است، که رییس شورای عالی مصالحه‌ی ملی در این ملاقات، از خدمات و تلاش‌های سفیر جمهوری اسلامی تاجیکستان تشكر نمود و نقش وی را در گسترش روابط افغانستان و تاجیکستان، موثر خواند.
این دفتر نوشته است، که دوکتور عبدالله عبدالله در این دیدار افزود، که تاجیکستان کشور دوست و همکار مردم افغانستان است و مردم کشور از همکاری صادقانه آن کشور در همه زمینه‌ها، قدردانی می‌نمایند.
این دفتر همچنان افزوده است، که دراین دیدار، شراف‌الدین امام، سفیر تاجیکستان، تجربه کارش در افغانستان را به یادماندنی توصیف کرد و افزود که کشور تاجیکستان به همکاری دوامدار و راهبردی با افغانستان متعهد است.
در پایان این خبرنامه آمده است، که امام افزود که تاجیکستان از روند گفت‌وگوهای صلح افغانستان حمایت می‌کند و امیدوار است که به جنگ طولانی در کشور نقطه پایان گذاشته شود.
یادآوری می کنیم، که چند روز است که نمایندگان دولت افغانستان و گروه طالبان برای نخستین بار رو در روی هم درباره مسایل مورد مناقشه گفت و گو می کنند.
