تاجیکستان تایید کرد: آماده کمک‌های لجستیکی در ارائه حمایت‌های بین‌‌المللی به افغانستان هستیم

سفارت تاجیکستان در روسیه اعلام کرد که در دیدار با نماینده ویژه اتحادیه اروپا برای افغانستان، وضعیت فعلی افغانستان و تهدیدات احتمالی برای امنیت منطقه‌ای مورد بحث قرار گرفت.

به گزارش اسپوتنیک، سفارت تاجیکستان در روسیه با نشر خبری از دیدار «دولتشاه گلمحمدزاده» سفیر تاجیکستان در مسکو با توماس نیکلاسون نماینده ویژه اتحادیه اروپا برای افغانستان خبر داد.

سفارت تاجیکستان در مسکو می‌گوید که در این دیدار طرفین، بر اهمیت تقویت بیشتر تعاملات بین تاجیکستان و اتحادیه اروپا برای تسهیل حل و فصل زودهنگام بحران افغانستان تاکید کردند. به‌ویژه راه‌های بیشتر ارائه کمک‌های بشردوستانه به مردم افغانستان از جمله نیاز به کمک در بازسازی اقتصادی آن کشور، مورد بحث قرار گرفته است.

در خبرنامه که سفارت تاجیکستان در مسکو منتشر کرده آمده است: سفیر تاجیکستان با توجه به توانایی‌های لجستیکی این کشور، آمادگی این جمهوری را برای ارائه کمک‌های بین‌المللی به مردم افغانستان از طریق خاک تاجیکستان اعلام کرد.

پیش از این، امامعلی رحمان، رئیس‌جمهور تاجیکستان گفته بود که این کشور آماده است تا توانایی‌های لجستیکی خود را برای ارائه کمک های بین‌المللی به افغانستان فراهم کند.

آقای رحمان در مراسمی برای تقدیم استوارنامه سفرای شماری از کشورها گفت: بحران عمیق سیاسی، نظامی، اقتصادی و اجتماعی در افغانستان، که باعث نگرانی جامعه جهانی شده است، به تنش در منطقه ما منجر شده است. تاجیکستان آماده ارائه توانایی های لجستیکی گسترده خود برای ارائه کمک‌های بین‌المللی به همسایه نزدیک خود است.

پس از آنکه دولت بایدن پایان عملیات نظامی امریکا در افغانستان و آغاز خروج نیروهایش را اعلام کرد، طالبان حمله‌ای را علیه نیروهای دولتی افغانستان آغاز کردند. در 15 اگست، طالبان بدون مواجهه با هیچ مقاومتی وارد کابل شدند و ظرف چند ساعت، کنترل کامل پایتخت افغانستان را به دست گرفتند. اشرف غنی، رئیس‌جمهور وقت افغانستان، گفت که برای جلوگیری از خونریزی، از سمت خود کناره گیری کرده و متعاقباً از کشور گریخته است.

در 6 سپتمبر، طالبان گفتند که کنترل کل کشور را به دست گرفته‌اند و یک روز بعد، حکومت موقت جدید خود را اعلام کردند. با این حال، این دولت هنوز به طور رسمی توسط هیچ یک از کشورهای جهان به رسمیت شناخته نشده است.