گروه طالبان در غزنی موترهای شخصی را به ‌نام دولتی غصب می‌کنند

منابع محلی در ولایت غزنی می‌گویند که طالبان در این ولایت موترهای شخصی مردم را به ‌نام موتر دولتی، به زور تصاحب می‌کنند.

به گزارش اسپوتنیک به نقل از رسانه ها، منابع محلی در ولسوالی جاغوری غزنی افراد طالبان را به باج‌گیری از مردم متهم کرده و می‌گویند که ده‌ها عراده موتر شخصی باشنده‌گان این ولسوالی از سوی طالبان به‌نام موتر دولتی به زور تصاحب شده است.

به گفته منابع، طالبان روز گذشته ۳۰ عراده موتر شخصی مردم را به‌نام موتر دولتی مصادره کرده‌اند.

منابع می‌گویند که طالبان شب‌هنگام وارد خانه‌های مردم شده و دست به مصادره موترها می‌زنند.

پس از تسلط طالبان بر افغانستان، شهروندان همواره از افزایش فعالیت‌های خودسر افراد این گروه شکایت می‌کنند.