به گزارش اسپوتنیک به نقل از خبرنامه ارگ ریاست جمهوری افغانستان، محمد اشرف غنی رئیس جمهور افغانستان امروز صبح در رأس یک هیئت بلند پایۀ دولتی برای سفر رسمی یک روزه عازم عشق‌آباد پایتخت ترکمنستان گردید.
رئیس جمهور جمهوری اسلامی افغانستان در این سفر ضمن ملاقات های جداگانه با قربانقلی بردی محمدوف رئیس جمهوری ترکمنستان و امام علی رحمان رئیس جمهوری تاجکستان در مراسم رسمی گشایش مسابقات آسیایی نیز اشتراک خواهد کرد.
رئیس جمهور افغانستان را در این سفر صلاح‌الدین ربانی وزیر امور خارجه، محمد حنیف اتمر مشاور امنیت ملی، اکلیل حکیمی وزیر مالیه، داکتر محمد همایون قیومی مشاور ارشد رئیس جمهور در امور زیربناها، محمد شاکر کارگر نمایندۀ خاص رئیس جمهور در امور کشورهای آسیای میانه، سیروس علاف مشاور رئیس جمهور در امور تجارتی و محمد هارون چخانسوری معاون ارتباطات استراتیژیک و رسانه‌های ریاست دفتر مقام عالی ریاست جمهوری همراهی می نمایند.
