به گزارش اسپوتنیک به نقل از سپیدار، دوکتور عبدالله عبدالله رئیس اجراییه جمهوری اسلامی افغانستان امروز (پنجشنبه، 19 میزان) در رأس یک هیأت بلندپایه‌ی دولتی که به منظور اشتراک در هفدهمین اجلاس سران حکومت‌های سازمان همکاریشانگهای عازم دوشنبه پایتخت جمهوری تاجیکستان گردید. در این سفر جناب صلاح‌الدین ربانی وزیر امورخارجه جمهوری اسلامی افغانستان و تعدادی از مسوولین حکومتی رئیس اجراییه کشور را همراهی می‌نمایند.
رئیس اجراییه افغانستان در اجلاس سران حکومت‌های سازمان شانگهای که سالانه برای ارزیابی وضعیت منطقه و سیاست‌های این سازمان برگزار می‌گردد به نمایندگی از جمهوری اسلامی افغانستان اشتراک و سخنرانی می‌کند.
رئیس اجراییه کشور در حاشیه‌ی نشست سران حکومت‌های شانگهای با جلالتمآب رئیس جمهور تاجیکستان، نخست‌وزیر روسیه، نخست‌وزیر چین٬ نخست‌وزیر ازبیکستان، نخست‌وزیر قزاقستان٬ نخست‌وزیر قرغیزستان٬ نخست‌وزیر تاجیکستان، نخست‌وزیر بلاروس و وزیر امورخارجه هند دیدار می‌کند.
رئیس اجراییه کشور در سخنرانی خود در این اجلاس و در دیدارهای خود با مقامات و نمایندگان کشورهای مختلف در حاشیه اجلاس در کنار موضوعات مختلف به طور عمده پیرامون نیاز مبرم مبارزه مشترک با دهشت‌افگنی، مبارزه با قاچاق مواد مخدر، گسترش همکاری‌و همگرایی منطقه‌ای، تطبیق برنامه‌های کلان منطقه‌ای، افزایش دادوستد بازرگانی و جلب حمایت کشورهای منطقه از روند صلح به مالکیت و رهبری افغانستان صحبت می‌کند.
