جواز فعالیت بانک پاکستانی در کابل لغو شد

بانک مرکزی افغانستان جواز فعالیت حبیب بانک پاکستان را لغو کرد.

به گزارش اسپوتنیک به نقل از رسانه ها، مسوولان بانک مرکزی افغانستان گفته اند که فعالیت حبیب بانک پاکستان در کابل در دو سال گذشته هیچگونه قرضه به افغان‌ها نداده، قوانین بانکداری افغانستان را رعایت نکرده و نیز در رشد اقتصادی کشور هم نقش نداشته است.
ایمل هاشور سخنگوی بانک مرکزی کشور امروز دوشنبه(12 حمل) گفته که به همین دلایل، جواز فعالیت حبیب بانک پاکستان لغو گردید.
آقای هاشور گفته، به کسانی که در حبیب بانک حساب دارند نیز سه ماه فرصت داده شده تا حسابات خود را تصفیه و مسدود کنند.
به گفته وی، مقرره بانکی کشور حکم می‌کند که تمامی مبادلات پولی در بانک‌های کشور باید به پول افغانی باشد؛ ولی تنها حبیب بانک این مقرره را رعایت نکرده است.
او افزوده که تنها دلیلی که بانک مرکزی به حبیب بانک پاکستان جواز فعالیت صادر کرده بود، این بود که بانک‌های افغانستان از تجربه این بانک سود ببرند؛ اما حبیب بانک این توقع بانک مرکزی را برآورده نکرده است.
شایان ذکر است، حبیب بانک پاکستان در سال 2004 فعالیت خود را در افغانستان آغاز کرده بود.