عبدالغفور آرزو، سفیر پیشین افغانستان در تاجیکستان، برنامۀ دولت کشور برای امضای سند همکاریهای استراتیژیک با جمهوری تاجیکستان را یک گام مثبت برای کشور میخواند.
«افغانستان و تاجیکستان دارای تاریخی مشترک بوده، و منافع اقتصادی و سیاسی مشترک زیادی دارند. تاجیکستان یکی از کشورهای پر آب جهان و یکی از مهمترین منابع برقی منطقه بهشمار میرود که این میتواند برای افغانستانی که مشکل برق دارد بسیار با ارزش باشد. تاجیکستان هشتمین کشور پر آب جهان است، بنابراین آبهای تاجیکستان بالقوه یک سرمایه حیاتی برای مردم افغانستان بشمار میرود»
پیش از این وزارت وزارت خارجه افغانستان در پی سفر سرپرست وزارت خارجۀ کشور به دوشنبه، از امضای سند همکاریهای مشترک میان افغانستان و تاجیکستان، خبر داد. در جریان این سفر دو روزه حنیف اتمر رابطۀ دو کشور را خصوصاً در روزهای دشوار مردم افغانستان سازنده توصیف نموده، و از کمکهای کشور تاجیکستان به افغانستان در زمینهی مبارزه با بحران کرونا، سپاسگزاری کرد.
آقای سراج الدین مهرالدین وزیر خارجهی تاجیکستان با استقبال از آغاز مذاکرات صلح افغانستان، افزود: تاجیکستان تجربهٔ کافی در اعمار بندهای آب دارد و آمادهٔ همکاری با افغانستان در این خصوص میباشد.
سفیر پیشین افغانستان در دوشنبه این پیمان را برای ثبات منطقه مفید میداند:
«هر قدر روابط تجاری و فرهنگی افغانستان با همسایههایش از جمله تاجیکستان گسترش پیدا کند، طبیعی است به ثبات منطقه میانجامد. فراموش نکنید که امنیت و ثبات یک امر منطقهایست. مشروعیت روابط افغانستان و تاجیکستان تنها محصور در ارادهی دولتمردان این دو کشور نیست. این مشروعیت ریشه در هویت یگانهی فرهنگی، تمدنی و تاریخی این دو ملت دارد، که پشتوانه این پیمان استراتژیک است».
افغانستان و تاجیکستان در حدود 1300 کیلومتر مرز مشترک دارند. قاچاق مواد مخدر و گسترش فعالیت داعش در شمال افغانستان سبب شده تا دولت تاجیکستان شیوۀ سختگیرانهتری را در این مرز به کار ببندد.