تمرینات نظامی روسیه در نزدیک مرزهای افغانستان

مقامات ارتش روسیه می‌گوید که این کشور و هم پیمانان آسیای مرکزی‌اش در نزدیک مرزهای افغانستان تمرینات نظامی، راه اندازی می‌کنند.

به گزارش اسپوتنیک، در یک بیانیۀ ارتش روسیه آمده‎است که جزییات این تمرینات در شهر دوشنبه پایتخت تاجیکستان از سوی نماینده‎گان سازمان امنیت جمعی که روسیه، تاجکستان، قزاقستان و قرغیزستان اعضای آن است، زیر بررسی قرار دارد.
تاجیکستان ۱ هزارو ۳۰۰ کیلومتر مرز مشترک با افغانستان دارد.
مسکو و دوشنبه بارها نگرانی‌شان را از بدتر شدن اوضاع امنیتی شمال افغانستان ابراز کرده‌اند و گفته‌اند که هراس‌افگنان می‌کوشند تا به کشورهای آسیای میانه و روسیه، نفوذ کنند.

این تمرینات در اواخر ماه اکتوبر سال روان میلادی در نزدیک مرزهای تاجیکستان با افغانستان، راه اندازی خواهند شد.